/ Бурхандаа өргөх баясал /
Дархан овогтны шүтээн
Дамдин Дорлиг бурхнаа
Дээдлэн шүтэж явна аа би
Далай их энэрэлд чинь
мөргөж, биширч явна аа би
Алх, дөшний жингэнэх нь
Аялгуут хөгжмийн эгшгээ
Бурхан та баясах нь
Бум олны цэнгэл ээ
Үеийн үед цуурайтах нь
Ган дөшний чимээ еэ
Ургийн урагт ундрах нь
Уран дархны ухаан аа
өндөр дээд удмыг минь
Ивээн нийгүүлсэж соёрхоно уу
Ахан дүүс олныг минь
Авран энэрч болгооно уу
Ум сайн амгалан болтугай.
Босон сууж хүлээсэн ханан элгэн уулс минь
Боргиотон оволзож цовхчсон угаасан тунгалаг ус минь
Бодол амраан цэнхэртлээ, сэтгэл баясган мяралзлаа
Хөх толбот хүмүүний хүй цөглөсөн газар аа
Хүсэж тэмүүлсэн миний амьд өлгий нутаг аа
Намиран үелзэж ганхсан битүү ширэнгэн шугуй минь
Номин зүлэг ширдэглэсэн хөрвөөн сэргэх буурь минь
Салхи өдөөн сэржигнэлээ зүрх огшоон урилаа
Хөх толбот хүмүүний хүй цөглөсөн газар аа
Хүсэж тэмүүлсэн миний амьд өлгий нутаг аа
Ханаран дугуйрж эмжсэн домогт хөх хярууд минь
Хаа холоос цэлэлзсэн хөх, цагаан нуурууд минь
Хажууд ойрхон дүнхийлээ хүсэл татан гөвөлзлөө
Хөх толбот хүмүүний хүй цөглөсөн газар аа
Хүсэж тэмүүлсэн миний амьд өлгий нутаг аа
Асарлан давхраатаж гөвөлзсөн аварга халиман нурууд минь
Хүрээлэн цэлийж хаяарсан тэнгис хөх тэнгэр минь
Ард гүдийн хоцорлоо хойноос үдэн ширтлээ
Хөх толбот хүмүүний хүй цөглөсөн газар аа
Хүсэж тэмүүлсэн миний амьд өлгий нутаг аа
П. Дэмбэрэл
Улиастай хот
2010.08.02
Солонго татуулсан хангай минь
Ягаан нөмөргөөр гоёж угтлаа
Санаж хүссэн аав, ээж минь
Сарвайн зүүгдэж угтлаа
Аяа миний нутаг диваажин аа
Ай хө би хувьтай төржээ
Цэлэлзэн долгиолох гол миньЦэнхэр хадаг дэлгэн угтлаа
Өсгөж торниулсан дүү нар минь
Өлмий өргөн баяслаа
Аяа миний нутаг диваажин аа
Ай хө би хувьтай төржээ
Хот ярайн тольдлоо
Хорвоогийн түмэн өнгө
Хосгүй сайхнаар тунарлаа
Аяа миний нутаг диваажин аа
Ай хө би хувьтай төржээ
Есөн хутагтын суварга минь
Цайран жагсаж угтлаа
Ертөнцийн амгалан бүхэн
Энд л бий гэж шивнэлээ
Аяа миний нутаг диваажин аа
Ай хө би хувьтай төржээ
Мандшир бурхны алтан ганжир нь
Мандах наранд гялалзан угтлаа
Миний ээжийн цайны дээж
Ширхэглэн цацарч дэгдлээ
Аяа миний нутаг диваажин аа
Ай хө би хувьтай төржээ
П. Дэмбэрэл
Улиастай хот
2010.08.18
